இந்திய அரசியலமைப்பு தினத்தையொட்டி இந்திய கம்யூனிஸ்ட் கட்சி தலைமை அலுவலகத்தில் உறுதிமொழி ஏற்பு நிகழ்ச்சி நடந்தது. கட்சியின் மாநில செயலாளர் இரா.முத்தரசன் தலைமையில் இந்த நிகழ்ச்சி நடந்தது.
நிகழ்ச்சிக்கு பின்னர் அவர் நிருபர்களிடம் கூறியதாவது:- பா.ஜ.க. ஆட்சியில் அரசியல் அமைப்பு சட்டத்திற்கு பாதுகாப்பு இல்லை. அதை பாதுகாக்க வேண்டும் என்று தான் உறுதிமொழி ஏற்கிறோம்.
இந்தியாவில் பாராளுமன்ற ஜனநாயக முறையைத் தான் கடைபிடித்துள்ளோம். மற்றொரு முறை ஆயுதம் ஏந்திய முறை இருக்கிறது. அதை நாம் கடைபிடிக்கவில்லை. இந்த நிலையில் பாராளுமன்ற ஜனநாயக முறையை சிதைக்கும் வகையில் தான் பா.ஜ.க. அரசு செயல்படுகிறது. மகாராஷ்டிரா தேர்தலில் இஸ்லாமிய பெண்களை வாக்களிக்க அனுமதிக்கவில்லை. இது எந்த ஜனநாயக முறை?
வாக்களிப்பது என்பது ஜனநாயக உரிமை அதுவும் தற்போது பறிக்கப்படுகிறது. இது பேராபத்தை ஏற்படுத்தும் செயலாகும். எனவே தான் இதை பாதுகாக்க வேண்டும். அதானி விவகாரத்தில் பா.ஜ.க. விளக்கெண்ணெய் விளக்கம் கொடுத்துக் கொண்டிருக்கிறது. யோக்கியமான பிரதமராக இருந்தால் அதானியை கைது செய்யட்டும்.
யார் யாருக்கு லஞ்சம் கொடுத்தனர் என்ற பட்டியலை வாங்கி நடவடிக்கை எடுக்கட்டும். தமிழ்நாடு, ஆந்திரா, கேரளா, டெல்லி என்பதல்ல பிரச்சனை. பா.ஜ.க. குரலும் பா.ம.க. குரலும் ஒன்றாக இருக்கிறது. ஏன் ஒன்றாக இருக்கிறது என்றால் அதானியை காப்பாற்றுவதற்கு தான். தோழர் என்ற வார்த்தை மிக சிறப்பானது. அதை எல்லோரும் பயன்படுத்துகிறார்கள். இதை தமிழக வெற்றி கழகத்தின் விஜய் பேசுவதால் ஆச்சரியம் ஒன்றுமில்லை.
இளம்வயதில் இருந்து சிறப்பாக செயல்படும் உதயநிதி ஸ்டாலின், துணை முதலமைச்சராகவும் பொறுப்பேற்று திறன்பட செயல்பட்டு கொண்டு இருக்கிறார். இன்னும் சிறப்பாக செயல்படுவதற்கு இனிய பிறந்த நாள் வாழ்த்துகளை அவருக்கு தெரிவித்துக்கொகிறேன் என்று இரா.முத்தரசன் கூறினார்.
