ஆந்திரப் பிரதேசத்தின் கிருஷ்ணா மாவட்டத்தில் இன்று அதிகாலை மரக்கட்டைகளை ஏற்றிச் சென்ற லாரி மீது கண்டெய்னர் லாரி மோதிய விபத்தில் 6 பேர் உயிரிழந்தனர்.
ஆந்திர மாநிலம், கிருஷ்ணா மாவட்டம், சீத்தனப்பள்ளி அருகே இன்று அதிகாலை மரக்கட்டைகளை ஏற்றிக்கொண்டு வந்த லாரியை கன்டெய்னர் லாரி முந்திச் செல்ல முயன்ற போது அதன் மீது மோதியது. இந்த விபத்தில் 5 பேர் சம்பவ இடத்திலேயே உயிரிழந்தனர்.
படுகாயமடைந்த 6 பேர் சிகிச்சைக்காக அருகிலுள்ள மருத்துவமனைகளுக்கு கொண்டு செல்லப்பட்டனர். அவர்களில் ஒருவர் வழியிலேயே இறந்துவிட்டார். மருத்துவமனைகளில் அனுமதிக்கப்பட்ட மற்றவர்களின் நிலை கவலைக்கிடமாக இருப்பதாக தகவல்கள் தெரிவிக்கின்றன.
இந்த விபத்து காரணமாக அச்சாலையில் 2 கி.மீ. அதிகமான தூரத்துக்கு கடும் போக்குவரத்து நெரிசல் ஏற்பட்டது. போலீஸாரும், உள்ளூர் அதிகாரிகளும் சம்பவ இடத்துக்கு விரைந்து வந்து விபத்தில் சிக்கியவர்களுக்கு உதவ மீட்பு நடவடிக்கையைத் தொடங்கினர்.
மேலும், போக்குவரத்தையும் சீர் செய்யும் பணியில் போலீஸார் ஈடுபட்டனர். விபத்தில் உயிரிழந்தவர்கள் இன்னும் அடையாளம் காணப்படவில்லை என போலீஸார் தெரிவித்தனர்.
