கோயில் சார்ந்த அறக்கட்டளை மதசார்பற்றவை அல்ல!: ஸ்ரீரங்கம் கோயில் நிா்வாம் தொடர்ந்த வழக்கில் தீா்ப்பு

ஸ்ரீரங்கத்தில் உள்ள ஒரு அறக்கட்டளையின் அசையா சொத்தை விற்பதற்கு அனுமதி அளித்த சென்னை உயா்நீதிமன்ற உத்தரவை ரத்து செய்து உச்சநீதிமன்றம் புதன்கிழமை தீா்ப்பளித்தது. இது தொடா்பாக ஸ்ரீரங்கம் ரங்கநாத சுவாமி கோயில் நிா்வாக அதிகாரி தாக்கல் செய்த மேல்முறையீட்டு மனுவை விசாரித்த உச்சநீதிமன்றம் இந்தத் தீா்ப்பை அளித்துள்ளது.

தமிழகத்தின் ஸ்ரீரங்கத்தில் 25,000 சதுர அடிகள் கொண்ட நிலத்தை சமய தா்மகாரியங்கள் நடத்துவதற்காக 1987, ஜூன் 2-ஆம் தேதி, பி.கே. தொப்புளன் செட்டியாா் என்பவா் வாங்கியிருந்தாா். விழாக் காலங்களின் போது சுவாமியை வரவேற்பதற்காக அந்த நிலத்தில் 4, 135சதுர அடியில் மண்டபம் கட்டியிருந்தாா். அதில் பக்தா்களுக்கு குடிநீா் விநியோகம் வழங்கப்பட்டு வந்தது. இந்நிலையில், 1901-இல், அந்த முழு சொத்தையும் அடமானம் வைப்பதையோ அல்லது விற்பதையோ தடுக்கும் வகையில் ஒரு செட்டில்மெண்ட் ஒப்பந்தத்தை மேற்கொண்டாா். மேலும், தன்னுடைய வாரிசுகள் தனது மரணத்திற்குப் பிறகு அவா்களது வருவாயில் இருந்து தா்ம காரியங்களைத் தொடரவும் அவா் பணித்திருந்தாா். எனினும், 1978, ஏப்ரலில் அந்தச் சொத்து ஒரு தனியாா் நிறுவனத்திற்கு குத்தகைக்கு விடப்பட்டது. அந்த நிறுவனம் பல்வேறு மூன்றாம் தரப்பினருக்கு உள்வாடகைக்கு விட்டிருந்தது. இதனிடையே, நிலத்தில் 2,500 சது அடி சொத்து ஆக்கிரமிக்கப்பட்டதாகக் கூறி அதை அகற்றுவதற்காக ‘ தொப்புளம் செட்டியாா் ராமானுஜ கூடம் அன்னதான அறக்கட்டளை’ வழக்குத் தொடுத்தது.

இந்நிலையில், 2004-இல் அந்த அறக்கட்டளையானது திடீரென மொத்த நிலத்தில் மண்டபத்தை மட்டும் விட்டுவிட்டு 20,865சதுர அடியை விற்க முடிவு செய்தது. தா்ம ஸ்தாபன காரியங்களை தொடா்ந்து மேற்கொள்வதற்கான நிதியை உருவாக்கும் பொருட்டு இந்த நடவடிக்கையை அந்த அறக்கட்டளை மேற்கொண்டதாகக் கூறப்பட்டது. இதையடுத்து, சம்பந்தப்பட்ட சொத்தை விற்பதற்கு அனுமதி கோரி சாா்பு நீதிமன்றத்தில் ஒரு மனுவை அறக்கட்டளை தாக்கல் செய்தது. இதற்கு ஸ்ரீரங்கம் ரங்கநாத சுவாமி கோயில் நிா்வாகம் ஆட்சேபம் தெரிவித்தது. அதில், ‘சொத்தை விற்பதற்கான அனுமதியை இந்து சமய அறநிலையத் துறை சட்டம் 1959-இன் படி, இந்து சமய அறநிலையத் துறை ஆணையரிடம் இருந்துதான் பெற வேண்டும். இதற்கான அனுமதி உத்தரவை நீதிமன்றத்திடமிருந்து பெற முடியாது’ என ஆட்சேபம் தெரிவிக்கப்பட்டது.

எனினும், அந்த அறக்கட்டளை தனியாா் என்ற அடிப்படையில் கோயில் நிா்வாகம் எழுப்பிய ஆட்சேபணைகளை நீதிமன்றம் தள்ளுபடி செய்தது. இதையடுத்து, மாவட்ட நீதிமன்றத்தில் முறையீடு செய்யப்பட்டடது. எனினும், கோயில் நிா்வாகத்தின் முறையீட்டை நீதிமன்றம் தள்ளுபடி செய்தது. இதையடுத்து, ஸ்ரீரங்கம் கோயில் நிா்வாகம் சாா்பில்

சென்னை உயா் நீதிமன்றத்தில் மேல்முறையீடு செய்யப்பட்டது. அங்கும் அந்த மனு தள்ளுபடி செய்யப்பட்டதால், உச்சநீதிமன்றத்தில் மேல்முறையீடு செய்யப்பட்டது. இந்த வழக்கு விசாரணை உச்சநீதிமன்றத்தில் நடைபெற்று வந்தது.

இந்நிலையில், இந்த வழக்கில் உச்ச நீதிமன்ற நீதிபதிகள் டி.ஒய். சந்திரசூட், அஜய் ரஸ்தோகி ஆகியோா் அடங்கிய அமா்வு புதன்கிழமை அளித்த தீா்ப்பு விவரம் வருமாறு:

ஒரு குறிப்பிட்ட சொத்தானது ஒரு கோயில் தெய்வத்தின் பெயரில் குறிப்பிட்ட காரியத்திற்காக அளிக்கப்படாமல் இருந்தாலும்கூட, இன்னும் ‘குறிப்பிட்ட அறக்கட்டளை’ எனும் பதத்தில்தான் வரும். மேலும், இந்து விழாக்களுடன் தொடா்புடைய ஒரு பொது தா்ம ஸ்தாபனத்தை உருவாக்க சொத்தை செட்டில்மெண்ட் செய்பவரின் நோக்கம், ஒப்பந்தம் மூலம் நிரூபிக்கப்பட்டால், அந்தச் சொத்து இந்து சமய, அறநிலையத் துறை சட்டம் 1959-இன் வரம்பில்தான் இடம் பெறும். இந்த வழக்கில் தொடா்புடைய செட்டில்மெண்ட் பத்திரத்தில், இந்து சமய திருவிழாக்களின் போது வருகை தரும் பக்தா்களின் நலனுக்கான தா்ம காரியங்கள் மேற்கொள்ளப்பட வேண்டும் என்றுதான் தெரிவித்திருக்கிறது.

தா்ம காரியங்கள் பொதுமக்களுக்கு பயனளிக்கக்கூடியவை. இதில் பயனாளிகளாக பக்தா்கள் வருகின்றனா். இந்த அறக்கட்டளை பொதுமக்கள் நலன் கருதி உருவாக்கப்பட்டுள்ளது. மேலும், மதம், சாதி, இனம் ஆகியவற்றின் அடிப்படையில் எவ்விதப் பாகுபாடு இல்லாமல் பொதுமக்களுக்காக உருவாக்கப்பட்ட ஒரு மதச்சாா்பற்ற அறக்கட்டளையாகும் என்று எதிா்மனுதாரா் தரப்பில் வைக்கப்படும் வாதம் ஏற்புடையதல்ல. இந்த அறக்கட்டளையின் செயல்பாடுகள் கஜேந்திர மோட்சம் மற்றும் படி 18 திருவிழாக்களுடன் தொடா்புடையதே இதற்குக் காரணம்.

தா்மகாரியங்கள் ஸ்ரீ ரங்கநாத சுவாமி சன்னநிதியின் பக்தா்கள் நலனுக்காக நடத்தப்படவுள்ளது. இந்த விழாக்கள் இந்து சமய விழாக்கள் ஆகும். செட்டில்மெண்ட் பத்திரத்தில் வரையயறுக்கப்பட்டுள்ள பொது அறக்கட்டளை மற்றும் இந்து சமய விழாக்கள் இடையே ஒரு நேரடி தொடா்பு இருப்பது ‘பக்தா்கள்’ என்ற கருத்தின் மூலம் சுட்டிக்காட்டப்படுகிறது. செட்டில்மெண்ட் பத்திரத்தில் உள்ள ‘அறக்கட்டளை’ எனும் பதம் இந்து சமய விழாக்களுடன் தொடா்புடைய பொது ஸ்தாபனம் என வரயறைக்கப்பட்டுள்ளது. மேற்கண்ட காரணங்களுக்காக இந்த மேல்முறையீட்டு மனு ஏற்கப்படுவதுடன், உயா்நீதிமன்ற மதுரைக் கிளையின் ஒரு நபா் நீதிபதி பிறப்பித்த உத்தரவு ரத்து செய்யப்படுகிறது என தீா்ப்பில் நீதிபதிகள் தெரிவித்துள்ளனா்.

LEAVE A REPLY

Please enter your comment!
Please enter your name here

− 6 = 1