பகுதிநேர ஆசிரியர்களை பணிநிரந்தரம் செய்ய வலியுறுத்தி முதல்வருக்கு கடிதம்

திமுக தேர்தல் வாக்குறுதி 181ஐ நிறைவேற்றி, பகுதிநேர ஆசிரியர்களை பணி நிரந்தரம் செய்ய வேண்டும் என தமிழ்நாடு அனைத்து பகுதிநேர ஆசிரியர்கள் கூட்டமைப்பு மாநில ஒருங்கிணைப்பாளர் எஸ்.செந்தில்குமார் கோரிக்கை மனுவை முதல்வர் ஸ்டாலினுக்கு அனுப்பி உள்ளார்.

அந்த கடிதத்தில் அவர் கூறியிறுப்பதாவது, திமுக ஆட்சிக்கு வந்து 16 மாதங்கள் ஆகியும், பகுதிநேர ஆசிரியர்களை பணி நிரந்தரம் செய்யாததால், பணி நெருக்கடிக்கு ஆளாகி வருகின்றனர்.  ஆகவே, பணி நிரந்தரம் செய்யப்படும் என்ற உத்தரவாதம் கேட்டு கோரிக்கை  விடுக்கப்பட்டுள்ளது.

பணி நிரந்தரம் எப்போது செய்யப்படும், எவ்வாறு செய்யப்படும் என்ற வரைமுறையை அறிவிக்க முதல்வர் வேண்டும். தற்போதைய வாரம் மூன்று அரைநாட்கள் பணியை, அனைத்து வேலை நாட்களும் நீட்டிக்க வேண்டும், பகுதிநேரத்தை முழுநேரமாக நீட்டிக்க வேண்டும், சம்பளத்தை பள்ளி ஆசிரியர்களோடு கருவூலத்தின் மூலமாக வழங்க வேண்டும், மகப்பேறு விடுப்பு, மருத்துவ விடுப்பு, தற்செயல் விடுப்பு போன்ற விடுப்பை வழங்க வேண்டும்.

பண்டிகை முன்பணம், போனஸ் வழங்க வேண்டும், குடும்ப நலநிதி, வருங்கால வைப்பு நிதி, மருத்துவ காப்பீடு வழங்க வேண்டும் என்ற இந்த முக்கிய கோரிக்கைகளை ஏற்று, உடனடியாக செயல்படுத்த வேண்டும் என கேட்டு கொள்ளப்பட்டுள்ளது.

இது குறித்து தமிழ்நாடு அனைத்து பகுதிநேர ஆசிரியர்கள் கூட்டமைப்பு மாநில ஒருங்கிணைப்பாளர் எஸ்.செந்தில்குமார் கூறியது: முதல்வர் ஸ்டாலின், முன்பு எதிர்கட்சி தலைவராக இருந்தபோது பகுதிநேர ஆசிரியர்களை பணி நிரந்தரம் செய்வதாக வாக்குறுதி கொடுத்தார். எனவே, முதல்வரே இதற்கான வழிமுறையை, வரைமுறையை செயல்படுத்தி அறிவிக்க வேண்டும்.

முதல்வர், பள்ளிக்கல்வி அமைச்சர் மற்றும் செயலாளரை சந்தித்து பணி நிரந்தரம் செய்யுங்கள் என பலமுறை கோரிக்கை கொடுத்துவிட்டோம்.பள்ளிக்கல்வி அமைச்சரும் சட்டசபையில் பகுதிநேர ஆசிரியர்கள் பணி நிரந்தரம் உள்பட தேர்தல் வாக்குறுதிகளை முதல்வர் நிறைவேற்றுவார் என தெரிவித்துவிட்டார்.

இனி முதல்வர் கையில் தான் முடிவு உள்ளது, பணி நிரந்தரம்   என்ற கனவோடு 16 ஆயிரம் பேர் இந்த வேலையில் சேர்ந்தோம். இறந்து போனவர்கள், 58 வயதால் பணி ஓய்வு பெற்றவர்கள் என இதில் 4 ஆயிரம் காலியிடம் ஆகிவிட்டது.

12 ஆயிரம் பேர் இந்த 10ஆயிரம் சம்பளத்தில் வாழ்வாதாரம் இழந்து தவிக்கிறோம். ஏற்கனவே 10 ஆண்டை தொகுப்பூதியத்திலே கடந்து விட்டோம்.  பலருக்கும் வயதாகிவிட்டது, இன்னும் சில காலம் தான் பணி செய்ய முடியும், இனியும் தாமதம் செய்யாமல் பணி நிரந்தரம் செய்ய வேண்டும் என்றார்.

LEAVE A REPLY

Please enter your comment!
Please enter your name here

31 − = 28